نحنا ما عم نفهم شو دخلو وديع العبسي تيقرر مين بدو يمول الحكمه ومين بيحقلو يدعما.
كلنا منتذكر أول هيدا الموسم وخلاله كمان كل التصريحات للعبسي لبقول فيها إنو الموسم المقبل تارك كرة السلة.
شو عدا ما بدا هلق؟ ليه هلأ مستقتل يعطل دعم الشركات ب ٢,٥ مليون دولار لمدة ٣ سنين بعقد خطي؟ هو أصلاً وينو العقد الي ماضي؟ ليش جايب جماعتو، من زياد عبس لغيرو، شو جايبن يعملو بإدارة نادي الحكمه؟
يا جماعة، هيدا الزلمه ما بهمو إلا السياسي والسياسي وبس، وأبداً نحنا هون ما عم نحكي سياسي، مع إنو نحنا مش متلو منستحي بانتمائنا.
الزلمه يلي بدو يدعم نادي معين لازم يحبو من كل قلبه متل ما نحنا منحب النادي الأخضر. ما يضحك علينا ويقلنا إنو داعم لنادينا وهو بنفس الوقت داعم نادي الشانفيل (صديقنا اللدود).
ما مننسى إنو السنه الماضية كان داعم ثلاث فرق إذا مش أكتر. ما مننسى إنو كان الداعم الأول لنادي انيبال زحله وبالفاينل فور إشترى لاعب اجنبي لنادي الشانفيل يوميته أعلى من معاش رئيس الجمهوريه اللبنانيه ع شهر.
ما مننسى أبداً إنو إشترى بطاقات الدخول على ملعب النادي الزحلاوي السنة الماضية ووزعن على جماعتو تيمنع الجمهور الزحلاوي يفوت عالملعب ويشجع فريقه.
ما مننسى إنو فل هريبه من نادي انيبال زحله لأن أسود زحله قالولو كرامتنا أهم من مصرياتك!
أكيد متل كل ملف لبناني ما في عليه إجماع، في إنقسام بالرأي على هيدا الموضوع كمان وبقوه، كل يلي منتمناه كجمهور كرة سلة وكجمهور نادي الحكمه بالأخص إنو كرامتنا قبل المصاري وقبل المصالح الشخصية. وبيبقى أملنا معلق بشخص الرئيس "ايلي مشنتف"، لنبقى... على خطى الرئيس أنطوان شويري.
