من الناحية الحزبية، الكلّ بيعرف مدى كان التزام بيار اسحق واندفاعه بحزب القوات اللبنانية واندفاعه وصل لحدّ الشهادة. والدي كان مناضل بالحزب لأقصى الحدود، واعتبر حزب القوّات اللبنانية خط أحمر ووحده صوت الحقّ بلبنان.
إلى جانب هالناحية اللّي كلّ رفاقي بالحزب بيعرفوا، في ناحية تانية لوالدي ما حدا بيعرفها غير المقرّبين.
والدي كان من الناس القلال. كان قوي وأبضاي كتير. ما كان يخاف من شي. كان رجال وكلمته كلمة. موقفه واضح وصريح وكلمته ما بيرجع عنها وما بحياته عطى كلمة لحدا وما كان قدّها. كان قلبه طيّب كتير وكان مهضوم كتير. كان بس يعرف أنّ حدا محتاج، كان يشيل كلّ اللّي بجيبته ويعطيه من دون ما يفكّر ويسأل، مع أنّ يكون هيدا كلّ اللّي معه؛ وهيدا الأمر بخبّرني ياه كلّ أصدقائه ومعارفه. كان مندفع كتير ومليان حياة. كانت الدني كلها مش سايعته. كان عنده أحلام كتيرة. كان نظيف الكف. كان شاطر كتير بمهنته وكان الكلّ بيحكي بذكائه واندفاعه. كان محبوب كتير بين الأصدقاء والأقارب. الكلّ بحبّه وبيوثقوا فيه وبيتّكلوا عليه بكلّ شي.
مش الكلّ بيعرف أنّ والدي من هو وزغير كان يشتغل ويتحمل مسؤولية. مش الكلّ بيعرف أنّ والدي تعرّف على إمّي وتجوزوا صغار كتير. والدي ما كان عنده شي وكان من عيلة متواضعة. وبالرغم من صعوبة ظروفه، والدي اشتغل وتعب كتير، ومن ولا شي ومن عرق جبينه اشترى محلّ ملك ليمارس فيه مهنته. وبعد فترة، والدي قدر يعمّر بيت حلو واشترى أرض.
والدي كان مذوق كتير، ومحلّ ما بيحطّ تركيزه بيحوّل كلّ شي وبيصير حلو. والدي عاش حياته عم يشتغل ويدفع ويتحمّل ضغوطات الحياة الصعبة ليأمّن لإلي وإمّي وإختي كلّ شي من دون ما نحسّ بولا أيّ نقص. وبالرغم من عمره القصير بالحياة، قدر يعمل فرق كبير. المجرمين حرموني من أغلى الناس، حرموني من أكبر دعم بالحياة. حرموني إنسان ما بيتعوّض بكنوز الدني. أنا فقدت قطعة من قلبي لمدى العمر.
اليوم، بفضل انتباهك علينا من فوق، وبفضل صلاة إمي وتضحياتها اللامتناهية، وبفضل حزب القوات اللبنانية وسمير جعجع اللّي بعتبرن عيلتي التانية، أنا اليوم صرت دكتورة وإختي علاماتها كتير عاليين بالمدرسة. نحنا منوعدك نحافظ على كلّ شي تركته ومحلّك بيرجع يفتح وإسمك بضلّ مرفوع لأنّ بطل متلك ما بموت.
إنت سقيت هالأرض بدمّك تنكفّي كلنا ونعيش بكرامتنا. كلّ ما بتقطع علي ظروف بشعة، دايماً بطلّع بصورتك وبعيونك المليانة حياة وأمل واندفاع ومثابرة وباخد القوّة.
بحبك يا مثلي الأعلى، يا شهيدي البطل.
اللّه يرحمك ويرحم كلّ الشهداء الأبطال، شهداء حزب القوات اللبنانية، شهداء الحقّ والانتفاضة على الظلم.
ما راحوا... باقيين
