برمة بلبنان...
كزدورة JUL 26, 2020

بظلّ الأزمة الاقتصادية يلي عم يمرق فيها البلد، وبظل انتشار فيروس كورونا، بلّشت الصيفية وبلشنا نفكر كيف بدنا نرجع للحياة الطبيعية. أكيد مش رح نوعى فجأة والاقتصاد بألف خير، ولا رح نوعى نلاقي كورونا اختفى. بس ما فينا نضل نايمين عأمل نصير نقدر نروح ونجي بكلّ رياحة ورواق. الصّيفية وصلت ورجعوا فتحوا المطاعم والمسابح والملاهي. بس ما فينا نضل بالمطعم ولا نبقى على البحر ولا نخيّم بالملاهي، فشو بدنا نعمل وكيف منقضي وقتنا؟

 

كلنا منفكر أن هالصيفية رح تكون أسوأ صيفيّة مرت علينا، لأن ما معنا سيولة أو لأن كلّ شي مسكر. يمكن لأن مننسى أن لبنان مش بس مطاعم وملاهي ليلية وبحر ومجمعات سياحيّة. يمكن لأن مننسى أن لبنان كبير وحلو وفيه كتير مطارح مليانة نشاطات. يمكن لأن مننسى أن مش كلّ شي بكلّف كتير، وبلبنان الـ10452 كم2، فيه 10452 معلم سياحي إذا مش أكتر.

 

السياحة مش بس سفر على باريس أو روما أو جزر المالديف... وما فيك تكون سائح ببلاد أجنبية إذا ما كنت سائح ببلدك وبتعرف المناطق مقصودة للسياحة. شو هي النشاطات يلي منقدر نعملها بلبنان اليوم؟

 

من الشمال للجنوب، ومن الساحل للجبل، لبنان مليان جمال...

1) بعلبك: مدينة كلّنا سامعين عنها ويمكن زرناها بس كنا بالمدرسة، بس الأكيد ما قدّرنا قيمة هالمعلم السياحي. بعلبك مشهورة عالميًّا بآثار للحضارة الرومانية القديمة ما بتتقدّر بثمن، وهي مجمع معابد: معبد باخوس أفضل ضريح قديم محفوظ بأبراج مهيبة، ومعبد جوبيتر مع أعمدته الرائعة. تذكارات ضخمة ومحفوظة بأفضل حلة من وقت الإمبراطورية الرومانية. وأكيد ما فينا ننسى المتاحف الموجودة بالنفق!

 

2) وادي قاديشا: المعروف بالوادي المقدس بفضل أهميته الدينية. هالوادي العجيب استقبل مجموعات من الرهبان المسيحية لآلاف السنين حتى اليوم. الوادي محاط ببساتين وغابة الأرز ومنحدرات ثلج على الأطراف، ومنحوت على نهر قاديشا. هيدا الوادي بيمتدّ على مجموعة كبيرة من الضيع بقضاء بشري، وهو المكان الأمثل للتسلية بالطبيعة والتخييم، ولزيارة أقدم الكنائس ومغارة الحبيس...

 

3) صور: مدينة جنوبية غنية بالتاريخ. مرق عليها الإغريق والرومان والفينيقيين والإمبراطورية العثمانية. كلّ مين مرق بصور ترك آثار وعلامة ليذكرنا بوجوده بالمدينة. إذا بتحب التاريخ، ما إلك إلا صور: موقع الميناء ومضمار سباق الخيل الروماني وتوابيت أثرية وأكتر من هيك... إذا حبّيت ترتاح، شوارع المدينة مطليّة بألوان كتيرة بتعطي رونق فرح وبسط عطول الساحل.

 

4) بعقلين: منطقة الشوف المثالية للاستمتاع بنهار بالطبيعة. بتشتهر هالقرية الحلوة بتراث طبيعي وتاريخي كبير. من قصر الشيخ حسين حماده للنهر والشلالات، بعقلين "وكر" الأشخاص يلي بحبوا المغامرات والاسترخاء. وإذا بتحب الشلالات، ما تنسى شلالات بلعا وأفقا وجزين.

 

5) قصر بوفورت – أرنون: المنظر من القلعة الصليبية القديمة بجنوب لبنان مشهد استثنائي. شرفة بتطل على النبطية وما بعد... كان موقع القصر استراتيجي لمعارك كثيرة عبر التاريخ. تدمّر قسم كبير من القصر بس هالأمر ما محي طابع الحضارات المختلفة يلي مرّت عليه. على الرغم من كل تاريخها المؤلم، قلعة بوفورت حتى اليوم واقفة صامدة وفخورة. وعلى الرغم من الدمار الخارجي، بعدن محافظين على قلب القلعة.

 

عدّينا جزء بسيط وبقي الكتير. لبنان رائع وكلفة زيارته رخيصة. صحيح بواب السفر مسكرة، بسّ تذاكر السفر عقلب لبنان كتيرة وبواب الهجرة عمناطق حلوة مفتوح. خلينا هالصيفية نتكشف جواهر لبنان المخفية ونزور مناطق مش زايرينا. مين بيعرف؟ يمكن لبنان أحلى من ما شايفين...

كزدورة JUL 26, 2020
إستطلاع
مجلة آفاق الشباب
عدد استثنائي
إقرأ المزيد