هيك بليلة كل شي تغيّر، كان في جبال هموم ووجع بين سطور مستقبلي، كنت ناطرة خلّص جامعتي إحمل شهادتي وفل! لوين؟ ما بهمّ، مش بإرادتي كنت رح اترك دمعة أمي وايد بيّي وضب اغراضي وفل لبلد ما بعرف في حدا. بس يلي بعرفو أن المطرح ما رايحة في شعب عنده حقوق وبطالب فيها. ما بيسكت وبيرضى يعيش بالذل.

بهالليلة ما كنت عارفي أن في وعي جديد عم يخلق، ما كنت عارفي أنّ في مثلي كتير جوّا بقلبن في ثورة وغضب ما بينوصف. في روح الاستمرار والتحدي. في شغف لبلدي وحبّ لكل حبة تراب بأرضي. ليلة 17 تشرين، ليلة يلي ولدت ثورة من رحم المعاناة. ثورة بتطالب بحقوقي وحقوقك يلي الحكام أخذوها منا وكنّا ساكتين. ثورة ما فرّقت بين كبير وصغير، ساحات مليانة أصوات كلها وجع وأمل. طرقات فيها غمر من الناس يلي الوضع الاجتماعي والاقتصادي والسياسي وحتى الصحي جمعها. ما تردّدت كون ثورجيّة، ومش صدفة تكون هالانتفاضة ثورة أمل. ومن وقتها كل شخص عنده كرامة وشغف صار عنده موعد دائم مع الثورة.

نهار بعد نهار، الصرخات كانت عم تقوى، والشعب يلي بيطمح وبيحلم ما قدر يسكت عن حقوقه، كلّ يوم كنا عم نكتر، ناس من قلبها بدّا التغيير الفعلي. شباب وصبايا حملوا فكرة الهجرة وتركوها جوّا النار يلي سكّرت طرقات وفتحت أبواب الأمل. عملنا من كلّ زاوية بالساحات والطرقات بيت للمطالبة والتحدي، بيت للفرج والانتفاض. كتار بلشوا يشوفوا وين الصح ووين الغلط. ملفات فساد انكشفت، والزعماء ما عادوا زعماء، ونحنا يلي اترقينا من رتبة مواطن مذلول لرتبة مواطن محق وعنده كرامة.

من الشمال لأقصى الجنوب، مرورًا بساحة النور بطرابلس "عروسة الثورة" لساحة الشهداء وقبضة الثورة، كلّها ساحات معركة. معركة الحضارة الجديدة يلي نحنا بدنا نخلقها، معركة لبنان وشعبه، معركة الانقلاب على الفساد وأربابه.

وكرمال كلّ دمعة حرقت خد ابن أو أم أو أب لشهداء الثورة، نحنا باقيين ع موعدنا مع الثورة، ثورة 17 تشرين، نقطة البداية يلي ما رح نختمها قبل ما نوصل لأهدافنا وناخذ كلّ حقوقنا. وأنا ما رح إنسى إهمال السلطة وفسادها يلي سبب جريمة مرفأ بيروت، ويلي صارت حافز كبير لنكمل مسيرتنا وما نوقف بالمطالبة بتحقيق العدالة.

كرمال كل شب وصبيّة بدن يبنوا لبنان ويعيشوا بكرامة بهالوطن لازم نكون ع موعد التعب اللذيذ، لنبقى دايمًا أوفياء لمطالبنا، ونبقى ع موعد دائم مع الثورة.