بسبب الوضع الصّحّي العصيب الذي نمرّ به وتعذّر توزيع مجلّة آفاق الشّباب، إليكم تقرير "كيف نرمي القفّازات والكمّامات بشكلٍ سليم؟"، من العدد ٨٩ من مجلّة آفاق الشّباب.
عم تتخلّص من الكفوف والكمّامات بالزّبالة أو عالأرض!؟ فكّرت شي بعامل النّظافة؟؟ إنّك ترمي كمّامة عالأرض، بمستوعب النّفايات أو بسلّة المهملات قرب مكنة سحب النّقود، بالبنك، بالمحلّات التّجاريّة وغيرا، بتكون عم تعرّض غيرك، وحالك بالمرّة المقبلة، لتنصاب بالكورونا.
ليش؟
فرضًا إنت كنت حامل المرض أو احتكّيت بشخص آخر مصاب بلا ما تعرف، رح ينقل هالمرض عالكمّامة أو الكفوف عالأكيد. بالمقابل، عامل النّظافة اللّي عم يقرّب من هالمخلّفات ليخلّصك منّا، رح يكون عم يعرّض نفسو لخطر إلتقاط الفيروس على جسمو أو تيابو. كمان بلا ما تعرف، أيّا شخص عم يمشي حدّ هالمخلّفات، أو عم يلمسا من غير قصد، أوعم يلمس المكان اللّي كانت في، بصير عرضة ليلتقط الفيروس.
هلّق، كيف فيك ترمي المخلّفات هودي بطريقة سليمة، وكيف فيك تأمّن أكبر حماية ممكنة لإلك ولغيرك؟ كلّ يلّي عليك تعملو هوّي إتّباع هالخطوات البسيطة التّالية:
١- تتتخلّص من الكفوف والكمّامة اللّي لابسا، استخدم محرمة نضيفة لإنتزاعا؛
٢- بتقدر تتخلّص من هالمخلّفات داخل كيس بلاستيك قابل للتّحلّل حفاظًا عالبيئة، أو داخل أيّا غالون بلاستيك محكم الإغلاق؛
٣- الكورونا بتقدر تعيش بضعة ساعات عالأسطح الخارجيّة، لذلك تتحمي نفسك وغيرك، انتظر حوالي ال٧٢ ساعة، أو ما يعادل ال٣ أيّام، لترجع تكبّ الغالون أو الكيس بمستوعب النّفايات.
ما تنسى إنّو ولو كنت لابس كفوف وكمّامة، إنّك تغسّل إيديك شغلة أساسيّة وضروريّة لزيادة الوقاية.
