يا ربّ، نحنا يلِّي بالأيَّام الصِّعبي تعذَّبنا ونحرمنا واستشهدنا، ما تخلِّي رفاقنا بالأيَّام الحلوة ينسونا...
نحنا يلِّي كان عنَّا طموحات وأحلام كتيري نحققا بالمستقبل، بس تناسيناها وحملنا البارودة مشان نحقق حلم إسمو "لبنان مستقلّ"...
نحنا يلِّي تركنا ضيعنا ومدارسنا وجامعاتنا، وركضنا لنعِين إخوتنا يلِّي عم يتهاجموا ويتهجَّروا... نحنا يلِّي قلنا للبواخر يلِّي كانت ناطرتنا بالبحر "رجعي نحنا باقيين هون"، وكانت هالمرَّة غير كلّ المرَّات...
نحنا يلِّي ودَّعنا أهلنا وأخدنا رضاهن، وبوَّسنا إخوتنا ورحنا عالمعركة ومش عارفين بأيَّ ثانية السَّارق بيِجي...
نحنا يلِّي تألَّمنا وبكينا عالسَّكت لأنُّو دمع البطل غالي للناس تشوفوا... نحنا يلِّي كان سلاحنا بإيد والمسبحة بتاني إيد، وآمنَّا إنُّو بقوُّة الرَّب رح ننتصر ونحرِّر أرضنا كلّ مرَّة... نحنا يلِّي ركعنا قدَّام الصَّليب وحملنا، وبالأخصّ حملنا صليب لبنان كلُّو معنا، مع كلّ رصاصة ومع كلّ هجوم...
نحنا يلِّي صلولنا إمَّاتنا وركعوا إخواتنا وبيَّاتنا لنرجع عالبيت شي يوم ويزفُّونا بأعراسنا، زفُّونا شهدا وعرسان لربّْنا...
نحنا يلِّي ما تردَّدنا نكبّ حالنا للموت من كتر محبِّتنا لإخوتنا ومن خوفنا ما يموتوا عنَّا، وما تنهان أرضنا وحرمة بيتنا...
نحنا يلِّي اليوم ضاعت كتير من وجوهنا وأسامينا وما حدا حسّ بتضحياتنا وعذابنا، وصرنا ذكرى وفكرة عن مقاومين مؤمنين بربُّن وبوطنن...
نحنا يلِّي عرفنا إنُّو اليوم بدنا نحكيكن من هون من السَّما ونقلكن ما تنسونا وحفظوا الأمانة، إنتو الحرَّاس بدالنا...
نحنا يلِّي قلبنا معكن وعليكن وعبلدنا، رفعوا راسكن صوب الله وصلُّولنا وصلُّوا لتضلّ بلادنا محميَّة... وبالنِّهاية، تذكَّروا إنُّو البلاد ما بتحميا إلَّا القضيَّة برجالا المؤمنة فيا، وإنُّو حضارتنا منفتخر فيا وما حدا بيعلا عليا...
صلولنا وضوُّولنا شموع وخلُّوا سراجكن مليان بالزَّيت لما ينعسوا الحرَّاس...